ភ្នំពេញ៖ សមាជិកសភាជាប់ឆ្នោតទាំង១២៥ បានអញ្ជើញធ្វើដំណើរទៅកាន់ព្រះបរមរាជវាំងនៅរសៀលម៉ោង២រសៀល ថ្ងៃទី២១ ខែសីហា នេះបន្ទាប់ពីត្រូវបានប្រកាសពីសមភាពក្នុងសភាជាតិកាលពីព្រឹកមិញ។

សមាជិកសភាទាំង ១២៥រូបធ្វើដំណើរចេញពីរដ្ឋសភាជាតិឆ្ពោះទៅព្រះបរមរាជវាំងជាទីដែលសមាជិកទាំងអស់ធ្វើសម្បថនៅចំពោះព្រះភ័ក្រព្រះមហាក្សត្រកម្ពុជា ព្រះបរមនាថ នរោត្តម សីហមុនី។

យោងតាមរដ្ឋធម្មនុញ្ញកម្ពុជាមាត្រា៨២ថ្មី បានតម្រូវឱ្យតំណាងរាស្ត្រទាំងអស់ត្រូវធ្វើសច្ចាប្រណិធានមុនចូលកាន់តំណែង។

ក្នុងការសច្ចាប្រណិធានសមាជិកសភាទាំងអស់បានធ្វើការសច្ចាប្រណិធានចំពោះព្រះភ័ក្រព្រះមហាក្សត្រដោយប្ដេជ្ញាគោរពនូវរដ្ឋធម្មនុញ្ញបម្រើជានិច្ច ទាំងក្នុងបច្ចុប្បន្ន ទាំងក្នុងអនគតនូវផលប្រយោជន៍ជាតិ ប្រជាជន និងមាតុភូមិកម្ពុជា។ សមាជិកសភាប្ដេជ្ញាការពារបូរណភាពជាតិព្រំដែនទាំងទឹកនិងគោក មិនអនុញ្ញាតឱ្យមានតំបន់អបគមន៍ មិនបម្រើប្រយោជន៍បរទេស ដោះស្រាយបញ្ញាជាតិដោយសន្តិវិធីគ្មានហិង្សា ហ៊ានប្រឆាំងនូវការឈ្លានពានពីបរទេស ប្រឆាំងនូវអំពើពុករលួយ អយុត្តិធម៌សង្គម និងគោរពជានិច្ចនូវលទ្ធិប្រជាធិបតេយ្យ សេរីនិយម និងគោរពនូវសិទ្ធិមនុស្ស៕